ភ្នំពេញ៖ ប្រធាននាយកដ្ឋានអង្គរក្ស លោកឧត្តមសេនីយ៍ឯក ជុំ សាវុឌ្ឍ បានបញ្ជាក់ថា ក្រុមប្រតិបត្តិការទប់ស្កាត់ និងបង្រ្កាបបទល្មើសលើផ្ទៃទឹកសាបនៃអគ្គស្នងការដ្ឋាននគរបាលជាតិបានត្រៀមមធ្យោបាយ និងសម្ភារគ្រប់គ្រាន់រួចជាស្រេច ដើម្បីចេញប្រតិបត្តិការការពារពង្រឹងសន្តិសុខ រក្សាសណ្តាប់ធ្នាប់ សុវត្ថិភាពលើផ្ទៃទឹក ក្នុងឱកាសកិច្ចប្រជុំកំពូលអាស៊ានលើកទី៤០ និងទី៤១ និងកិច្ចប្រជុំពាក់ព័ន្ធឆ្នាំ២០២២ ដែលធ្វើឡើងនៅសណ្ឋាគាររ៉េស៊ីដង់សុខាភ្នំពេញ ចាប់ថ្ងៃទី០៧-១៣ ខែវិច្ឆិកា ឆ្នាំ២០២២។

ប្រធាននាយកដ្ឋានអង្គរក្ស បានណែនាំឱ្យក្រុមប្រតិបត្តិការទប់ស្កាត់ និងបង្រ្កាបបទល្មើសលើផ្ទៃទឹកសាបនៃអគ្គស្នងការដ្ឋាននគរបាលជាតិ ត្រូវយកចិត្តទុកដាក់និងការពារឲ្យបាន ពោលមិនត្រូវធ្វេសប្រហែស ក្នុងឱកាសកម្ពុជាធ្វើប្រធានកិច្ចប្រជុំកំពូលអាស៊ានលើកទី៤០ និងទី៤១ និងកិច្ចប្រជុំពាក់ព័ន្ធឆ្នាំ២០២២។

ជាមួយគ្នានេះ លោកប្រធាននាយកដ្ឋានអង្គរក្សក៏បានណែនាំកងកម្លាំងទាំងអស់ត្រូវគោរពវិន័យ បទបញ្ជា ជាពិសេសបំពេញភារកិច្ចតាមផែនការការពារដែលថ្នាក់ដឹកនាំប្រគល់ជូនដោយអនុវត្តឱ្យមានប្រសិទ្ធភាព និងមានការទទួលខុសត្រូវខ្ពស់។

ដើម្បីរក្សារបៀបរៀបរយ អាជ្ញាធររាជធានីភ្នំពេញបានជម្លៀសកាណូតទេសចរណ៍ដែលចតនៅមាត់ទន្លេចតុម្មុខ មកចតនៅមាត់ទន្លេបាសាក់សួនច្បារក្រុងតាខ្មៅបន្ទាប់ពីកិច្ចប្រជុំកំពូលអាស៊ានត្រូវបានបញ្ចប់រហូតដល់ថ្ងៃទី១៧ ខែវិច្ឆិកា ឆ្នាំ២០២២។

គូសបញ្ជាក់ថា ដើម្បីធានាសន្តិសុខ និងសុវត្ថិភាពជូនថ្នាក់ដឹកនាំកំពូលៗមកចូលក្នុងកិច្ចប្រជុំកំពូលអាស៊ាន ប្រព្រឹត្តទៅដោយរលូន កងកម្លាំងជាង១ម៉ឺននាក់ត្រូវបានដាក់ពង្រាយដើម្បីរក្សាសន្ដិសុខ សណ្ដាប់ធ្នាប់ និងសុវត្ថិភាព៕